आजकालच्या पाश्चात्य संस्कृतीची अनेक लोक भारताच्या प्राचीन नृत्य कलांचे ज्ञान मिळवण्यास उत्सुक आहेत. सध्याच्या धावपळीच्या युगात आपली कला जोपासून करिअर करणे हे स्त्रियांसाठी खूप अवघड आहे. त्यातून जर भरतनाट्यमची आवड असेल तर सुनियोजन, नियमित सराव, ताल, लय, शास्त्रीय संगीताची आवड हे नियम सुयोग्यरित्या पाळले तर भरतनाट्यम नृत्यशैलीत यश मिळणे शक्य होते. भरतनाट्यम् शास्त्रात अभिनयदर्पणामध्ये वर्णन केलेले हस्तमुद्राकार, पादभेद, दृष्टिभेद, शिरोभेद, ग्रीवाभेद, मंडलभेद इत्यादी ह्या सर्वांचा वापर नृत्त आणि नृत्यात पूर्णतः नाट्यधर्मी पध्दतीने केला जातो. भारतीय कला व संस्कृती यांचा प्रसार करणे हा प्रबोधन गोरेगावचा मुळ उद्देशांपैकी एक असून १९९५ साली नालंदा नृत्य अँकेडमीच्या सहकार्याने प्रबोधन गोरेगाव संस्थेने प्रबोधन भरतनाट्यम अँकेडमी सुरु केली. भरतनाट्यमचे वर्ग सुरु होऊन जवळपास २३ वर्ष पुर्ण झाले असून सुमारे २८ पेक्षा अधिक आरंगेत्रम् या कार्यक्रमाचे आयोजन केले. सौ. संध्या दामले यांच्या मार्गदर्शनाखाली येथे दरवर्षी १७० हून जास्त मुली या नृत्यप्रकाराचे प्रशिक्षण घेतात. भरतनाट्यम प्रशिक्षणाचा कालावधी ७ वर्षाचा असून आठवड्यातून शुक्रवार व शनिवार या दिवशी नृत्य प्रशिक्षण दिले जाते. दरवर्षी विद्यार्थींनींची वार्षिक परिक्षा घेऊन उत्तीर्ण विद्यार्थींना प्रमाणपत्र दिले जातात. प्रबोधन गोरेगावच्या भरतनाट्यम् केंद्रात व्यावसायिक पातळीवर कार्यक्रम शास्त्रोक्त सादरीकरण्यापर्यंत विद्यार्थ्यांस प्रशिक्षण दिले जाते. जसे गीतगोविंद, गीतरामायण, वीर सावरकर महोत्सव आदी कार्यक्रमामध्ये प्रबोधनच्या विद्यार्थांनी उत्तम यश प्राप्त केले आहे. अखिल भारतीय सांस्कृतिक (पुणे) संघातर्फे २०१५ च्या कालावधीत प्रियंका तावडे या विद्यार्थीनीने भरतनाट्यम् या शास्त्रीय नृत्यप्रकार स्पर्धेत गोल्ड मेडल प्राप्त केले. दरवर्षी नृत्यांगनांना कार्यक्रमाअंतर्गत व्यासपीठ उपलब्ध करुन द्यावे हा प्रबोधन गोरेगावचा मुख्य हेतु आहे.